Monday 8 December 2014

സഹനവിശുദ്ധിയുടെ ഭരണങ്ങാനം

കഴിഞ്ഞ അവധിക്ക്, കോട്ടയത്ത് ഉണ്ടായിരുന്നപ്പോൾ പെട്ടെന്ന് വീണുകിട്ടിയ അര ദിവസത്തിന്റെ ഔദാര്യത്തിലാണ് ഭാര്യയും ഞാനും കൂടി ഭരണങ്ങാനത്തേയ്ക്ക് വച്ചുപിടിച്ചത്. കോട്ടയം - ഏറ്റുമാനൂർ പതിവു പോലെ ക്ഷമപരീക്ഷിച്ചു. പക്ഷെ അതുകഴിഞ്ഞാൽ മാണിസാറിന്റെ സാമ്രാജ്യത്തിലെ പുതുപുത്തൻ പാത, മീനച്ചിലാറിന്റെ കരയിലൂടെ...

ഇന്ത്യയിലെ ആദ്യത്തെ വിശുദ്ധയുടെ കബറിടം ഇവിടെയാണ്‌. കാറ്റികിസം ക്ലാസ്സിൽ വിശുദ്ധന്മാരെ കുറിച്ചൊക്കെ പഠിക്കുമ്പോൾ കരുതിയിരുന്നത് അവരെല്ലാം തന്നെ യേശുവിന്റെ സമകാലീനരോ അല്ലെങ്കിൽ അത്രയും അതിപുരാതനരോ ആണ് എന്നൊക്കെയായിരുന്നു. ചരിത്രത്തിൽ താല്പര്യമുണ്ടായ കാലത്ത് മതതാല്പര്യം കുറയുകയും ചെയ്തു. അതുകൊണ്ട് ഇന്ത്യയ്ക്ക് സ്വാതന്ത്ര്യം കിട്ടുന്നതിന് തൊട്ടുമുൻപത്തെ വർഷം മാത്രം, മുപ്പത്തിയാറാം വയസ്സിൽ, മരിച്ചുപോയ ആളാണ് വിശുദ്ധയാക്കപ്പെട്ട അൽഫോണ്‍സാമ്മാ എന്ന് മനസ്സിലാക്കിയപ്പോൾ അത്ഭുതത്തോടൊപ്പം അതൊരു വിശുദ്ധവിഗ്രഹഭഞ്ജനം കൂടിയായാണ് അനുഭവപ്പെട്ടത്. (ഏവുപ്രാസിയാമ്മ 1952 - ലാണ് മരണപ്പെടുന്നതെങ്കിലും അൽഫോണ്‍ സാമ്മയെക്കാൾ പ്രായം കൂടുതലായിരുന്നു അവർക്ക്.)

വിശുദ്ധ തോമസിനോളം (?) നീണ്ടു കിടക്കുന്ന കേരള കൃസ്ത്യൻ സമൂഹത്തിന് പത്ത് രണ്ടായിരം വർഷത്തെ ശൂന്യതയ്ക്ക് ശേഷം, കഴിഞ്ഞ അഞ്ചു വർഷത്തിനിടയ്ക്ക് പെട്ടെന്ന് മൂന്ന് വിശുദ്ധരെ കിട്ടിയതിലുള്ള രാഷ്ട്രീയം, അങ്ങനെയൊന്നുണ്ട് എന്ന് സംശയിക്കുമ്പോൾ തന്നെ, എന്നെപോലുള്ള ഒരാൾക്ക്‌ ഏറെക്കൂറെ അജ്ഞാതമാണ്.


ഭരണങ്ങാനത്ത് തിരക്കുണ്ടായിരുന്നു. പക്ഷെ പ്രതീക്ഷിച്ചതുപോലുള്ള വൻ ജനക്കൂട്ടത്തെയൊന്നും കണ്ടില്ല. കബറിടം കണ്ടതിനു ശേഷം എതിർവശത്തുള്ള പള്ളിയുടെ വരാന്തയിൽ ഞാനും അവളും വന്നുനിന്നു. വടക്കുനിന്നും കരിമേഘത്തിന്റെ ഒരു വലിയ പാളി കബറിടത്തിന് മുകളിലൂടെ ഒഴുകിവന്ന് പരിസരത്തെയാകെ ഇരുണ്ടതാക്കുകയും, വിഷലിപ്ത മാനസങ്ങൾക്കുമേൽ വിശുദ്ധമഴയായി പെയ്തു തിമിർക്കുകയും ചെയ്തു.

അൽഫോണ്‍സാമ്മയുടെ ജീവിതം 'സഹനം' എന്ന ക്രിസ്ത്യൻ എത്തിക്സിന്റെ ഭാഗമായിവരുന്ന അവസ്ഥയുമായി ബന്ധപ്പെട്ടതാണ്. സഹനം എന്നത് ഒരു മനുഷ്യാവസ്ഥയാണ് - കൃസ്തുമതം അതിനെ പ്രശ്നവൽക്കരിക്കുകയും മനുഷ്യജീവിതത്തിൽ പ്രാക്ടീസ് ചെയ്യാനുള്ള താത്വികതലം ഒരുക്കിക്കൊടുക്കുകയും ചെയ്തു എന്നേയുള്ളൂ. സഹനം എന്നത് പലപ്പോഴും രോഗാവസ്ഥയുമായി ബന്ധപ്പെട്ട് ഉരുത്തിരിയുന്നതാണ് - അൽഫോണ്‍ സാമ്മയുടെ കാര്യത്തിലും അത് വ്യത്യസ്ഥമായിരുന്നില്ല. മരണാന്തര ജീവിതം നൽകുന്ന ബ്ലിസ്ഫുൾ ആയിട്ടുള്ള അനന്തതുടർച്ചയെ കുറിച്ചുള്ള മോഹമാണ് ഇതിന്റെ അടിസ്ഥാനം. ഇഹലോകത്തിൽ ഇത് വല്ലാത്തൊരു ആശ്വാസമാണ്. അതിന്റെ പ്രത്യക്ഷമായ ഉദാഹരണമായി മാറിയതാവും അൽഫോണ്‍സാമ്മയുടെ വിശുദ്ധപ്രസക്തി.

ഞങ്ങൾ സോകോൾഡ് തീർത്ഥയാത്രകൾ നടത്താറില്ല, തീർത്ഥാടന സ്ഥലങ്ങൾ ഒഴിവാക്കാറുമില്ല. മഴയൊഴിഞ്ഞ് ശുദ്ധമായ പകലിന്റെ നനഞ്ഞ വീഥിയിലൂടെ ഭരണങ്ങാനത്തു നിന്നും മടങ്ങുമ്പോൾ വീണ്ടും അറിഞ്ഞു - ഏത് യാത്രയും തീർത്ഥാടനമാണ്!

00

2 comments:

  1. Bharananganam is very near to my village. I have visited there once with my friend from Trivandrum.

    ReplyDelete
    Replies
    1. പശ്ചിമഘട്ട താഴ്‌വാരത്തിലെ ഇടനാടുകൾക്ക് അതിന്റേതായ ഒരു പച്ചസൗന്ദര്യമുണ്ട്...

      Delete